- పౌర సమస్యలపై అధికారులతో సమీక్ష
సైబరాబాద్ (ప్రభంజనం): వన్ వార్డ్ ఎవరీ డే కార్యక్రమంలో భాగంగా సైబరాబాద్ మున్సిపల్ కార్పొరేషన్ (సీఎంసీ) కమిషనర్ శ్రీజన, జోనల్ కమిషనర్, డిప్యూటీ కమిషనర్ సంబంధిత శాఖల అధికారులతో కలిసి బుధవారం సుభాష్ నగర్ వార్డును సందర్శించి, రెసిడెంట్ వెల్ఫేర్ అసోసియేషన్ ప్రతినిధులతో సమావేశమై స్థానిక పౌర సమస్యలు, అవసరాలను సమీక్షించారు. ఈ సందర్భంగా ప్రజలు ప్రధానంగా డ్రైనేజీ ఓవర్ఫ్లో, దెబ్బతిన్న, మరమ్మతులు అవసరమైన రోడ్లు, పార్కుల అభివృద్ధి, పారిశుధ్యం, నిర్మాణ కూల్చివేతల వ్యర్థాల తొలగింపు, అలాగే దోమల నియంత్రణకు క్రమం తప్పకుండా ఫాగింగ్ వంటి అంశాలను ప్రస్తావించారు.
ప్రజలు ప్రస్తావించిన సమస్యలను అవసరమైన తదుపరి చర్యల కోసం సర్కిల్ అధికారులు నమోదు చేశారు. సమస్యలను సమీక్షించిన కమిషనర్, వాటిని ప్రాధాన్యతతో పరిశీలించి త్వరితగతిన పరిష్కరించేందుకు అవసరమైన చర్యలు చేపట్టాలని సంబంధిత శాఖల అధికారులను ఆదేశించారు. వివిధ శాఖలు సమన్వయంతో పనిచేస్తూ, గుర్తించిన సమస్యల పురోగతిని పర్యవేక్షించి సకాలంలో తదుపరి చర్యలు చేపట్టాలని సూచించారు. వన్ వార్డ్ ఎవరీ డే కార్యక్రమం ద్వారా ప్రజలతో నేరుగా మమేకమై, వార్డు స్థాయి పౌర సమస్యలపై ప్రాధాన్యతతో చర్యలు చేపడుతున్నారు.