ఐదు ఓవర్లు, ఐదు వికెట్లు, ఒక్క పరుగూ ఇవ్వకుండా..

టెస్ట్ క్రికెట్ చరిత్రలో ఎవరికీ సాధ్యం కాని అద్భుతాన్ని వెస్టిండీస్ ఆల్‌రౌండర్ జస్టిన్ గ్రీవ్స్ ఆవిష్కరించాడు. పాకిస్థాన్‌తో ట్రినిడాడ్‌లో జరుగుతున్న తొలి టెస్టులో వరుసగా ఐదు వికెట్ మెయిడెన్ ఓవర్లు వేసి ప్రపంచ రికార్డు నెలకొల్పాడు. ఈ చారిత్రక ప్రదర్శనతో అతను టెస్టుల్లో తన తొలి ఐదు వికెట్ల హాల్‌ను కూడా నమోదు చేసుకున్నాడు.

బ్రియన్ లారా క్రికెట్ అకాడమీ వేదికగా జరుగుతున్న ఈ మ్యాచ్ మూడో రోజు ఆటలో గ్రీవ్స్ ఈ ఘనత సాధించాడు. వెస్టిండీస్ తొలి ఇన్నింగ్స్‌లో 311 పరుగులు చేయగా, బదులుగా పాకిస్థాన్ ఒక దశలో 244/3 పటిష్ఠ‌ స్కోరుతో భారీ ఆధిక్యం దిశగా సాగుతున్నట్టు కనిపించింది. సెంచరీ పూర్తి చేసుకున్న షాన్ మసూద్ క్రీజులో ఉండటంతో పాక్ ఆధిపత్యం చెలాయించేలా క‌నిపించింది. అయితే, బౌలింగ్‌కు వచ్చిన గ్రీవ్స్ మ్యాచ్ స్వరూపాన్నే మార్చేశాడు.

తన అద్భుతమైన స్పెల్‌తో పాక్ పతనాన్ని శాసించాడు. తొలుత మసూద్‌ను పెవిలియన్ చేర్చిన గ్రీవ్స్, ఆ తర్వాత ఆమిర్ జమాల్, అలీ ఉస్మాన్, మహ్మద్ రిజ్వాన్‌లను వరుస ఓవర్లలో ఔట్ చేశాడు. ఈ క్రమంలో ఒక్క పరుగు కూడా ఇవ్వకుండా వికెట్లు తీస్తూ పాక్‌ను కోలుకోలేని దెబ్బ తీశాడు. లంచ్ విరామం తర్వాత బౌలింగ్‌కు వచ్చి మహ్మద్ అబ్బాస్‌ను ఔట్ చేసి, తన ఐదో వికెట్ మెయిడెన్‌తో పాటు కెరీర్‌లో తొలిసారి ఐదు వికెట్ల ప్రదర్శనను పూర్తి చేసుకున్నాడు. మొత్తం 11 ఓవర్లలో 27 పరుగులిచ్చి 5 వికెట్లు పడగొట్టాడు. పాకిస్థాన్ 282 పరుగులకు ఆలౌట్ కావడంతో విండీస్‌కు 29 పరుగుల తొలి ఇన్నింగ్స్ ఆధిక్యం లభించింది.

ఇంతకుముందు ఈ రికార్డు ఇంగ్లండ్ పేసర్ స్టువర్ట్ బ్రాడ్ (2016లో దక్షిణాఫ్రికాపై 4 వరుస వికెట్ మెయిడెన్లు) పేరిట ఉండేది. తన ప్రదర్శనపై గ్రీవ్స్ మాట్లాడుతూ.. “క్రమశిక్షణతో బౌలింగ్ కొనసాగించి, వికెట్లు తీయాలని కెప్టెన్ రోస్టన్ ఛేజ్ సూచించాడు. బంతి సహకరించడంతో ఫలితం దక్కింది. ఐదు వికెట్లు తీయడం ఆనందంగా ఉన్నా, మ్యాచ్‌లో ఇంకా చేయాల్సింది చాలా ఉంది” అని తెలిపాడు.

అయితే, గ్రీవ్స్ చారిత్రక ప్రదర్శనతో లభించిన ఆధిక్యాన్ని విండీస్ నిలబెట్టుకోలేకపోయింది. మూడో రోజు ఆట ముగిసే సమయానికి రెండో ఇన్నింగ్స్‌లో పాక్ బౌలర్లు విజృంభించడంతో వెస్టిండీస్ 126 పరుగులకే 7 వికెట్లు కోల్పోయి కష్టాల్లో పడింది. దీంతో మ్యాచ్ ఆసక్తికరంగా మారింది.