- ఏలూరులో స్టార్ లివర్ టాల్క్స్ 2026 కార్యక్రమం
- కాలేయ వ్యాధులు, లివర్ ట్రాన్స్ప్లాంటేషన్పై వైద్యులకు క్లినికల్ అవగాహన
- పాల్గొన్న వైద్య, పీజీ విద్యార్థులు, ప్రాక్టీసింగ్ వైద్యులు, అధ్యాపకులు
- ఇంటరాక్టివ్ కేస్ చర్చలు, కాలేయ వ్యాధులు, లివర్ ట్రాన్స్ప్లాంటేషన్లో తాజా వైద్య పురోగతిపై అవగాహన
ఏలూరు : ( ప్రభంజనం )
స్టార్ హాస్పిటల్స్, ఏఎస్ఆర్ఎం హాస్పిటల్స్, ఏఎస్ఆర్ఎం మెడికల్ కాలేజ్ సంయుక్త ఆధ్వర్యంలో స్టార్ లివర్ టాక్స్ 2026 పేరుతో కాలేయ వ్యాధులు, లివర్ ట్రాన్స్ప్లాంటేషన్ నిర్వహణపై సమగ్ర శాస్త్రీయ అకాడమిక్ కార్యక్రమాన్ని ఏలూరులోని ఏఎస్ఆర్ఎం కాలేజ్, బి మాడ్యూల్, మినీ ఆడిటోరియంలో విజయవంతంగా నిర్వహించారు.
ఈ శాస్త్రీయ కార్యక్రమంలో వైద్య విద్యార్థులు, పీజీ విద్యార్థులు, ప్రాక్టీసింగ్ వైద్యులు, అధ్యాపకులు పాల్గొని ప్రముఖ నిపుణుల ఉపన్యాసాలు, ఇంటరాక్టివ్ కేస్ చర్చలు, కాలేయ వ్యాధులు, లివర్ ట్రాన్స్ప్లాంటేషన్లో తాజా వైద్య పురోగతిపై అవగాహన పొందారు.
ఈ కార్యక్రమానికి ఆంధ్రప్రదేశ్ మెడికల్ కౌన్సిల్ ( ఏపీఎంసీ ) నుంచి 2 సీపీడీ క్రెడిట్ పాయింట్లు లభించాయి. కాలేయ వ్యాధులపై క్లినికల్ అవగాహన పెంపొందించడంతో పాటు ఆధారిత వైద్య విధానాలను ప్రోత్సహించే వేదికగా ఈ కార్యక్రమం నిలిచింది.
ఈ కార్యక్రమానికి డాక్టర్ మెట్టు శ్రీనివాస్ రెడ్డి చైర్మన్గా వ్యవహరించగా డాక్టర్ జీ. శ్రీనివాస్ రెడ్డి, డాక్టర్ రఘురాం రెడ్డి, డాక్టర్ సునీల్ కుమార్, డాక్టర్ సౌజన్య తేజ, డాక్టర్ కృష్ణవర్ధన్ తెలికిచెర్ల ఆర్గనైజింగ్ సెక్రటరీలుగా వ్యవహరించారు. వివిధ విభాగాలకు చెందిన ప్రముఖ వైద్య నిపుణులు, అధ్యాపకులు పాల్గొని శాస్త్రీయ ఉపన్యాసాలు, ప్యానెల్ చర్చలు, కేస్ ఆధారిత బోధన నిర్వహించారు.
కాలేయ నిర్మాణం, పనితీరు, లివర్ ఫంక్షన్ టెస్టుల విశ్లేషణ, లివర్ శస్త్రచికిత్స సూత్రాలు, లివర్ ట్రాన్స్ప్లాంటేషన్లో అనస్థీషియా, అలాగే అక్యూట్ లివర్ ఇంజురీ, లివర్ ఫెయిల్యూర్, క్రానిక్ లివర్ డీసీస్, క్రానిక్ లివర్ ఫెయిల్యూర్ వంటి అంశాలపై నిపుణులు శాస్త్రీయంగా వివరించారు.
అలాగే అక్యూట్ లివర్ ఫెయిల్యూర్ లో ఐసీయూ నిర్వహణ, లివర్ ట్రాన్స్ప్లాంటేషన్, సిరోసిస్ పునరావృత అసైటిస్ నిర్వహణ, నాన్-సిరోటిక్ రోగుల్లో హెపటోసెల్యులర్ కార్సినోమా, లివర్ హీమాంజియోమా, మెటబాలిక్ డిస్ ఫంక్షన్- అసోసియేటెడ్ స్టాటటిక్ లివర్ డీసీస్, ఆల్కహాల్ సంబంధిత కాలేయ వ్యాధులు, క్రానిక్ హెపటైటిస్-బి, లివర్, కిడ్నీ ట్రాన్స్ప్లాంటేషన్, బిలియరీ అట్రేషియా, విల్సన్స్ వ్యాధిలో అత్యవసర లివర్ ట్రాన్స్ప్లాంటేషన్ వంటి అంశాలపై ఇంటరాక్టివ్ కేస్ సెమినార్లు నిర్వహించారు.
ఈ సందర్భంగా డాక్టర్ మెట్టు శ్రీనివాస్ రెడ్డి మాట్లాడుతూ.. “స్టార్ లివర్ టాల్క్స్ 2026″ ద్వారా తరగతి గది విద్యకు, వాస్తవ క్లినికల్ అనుభవానికి మధ్య ఉన్న అంతరాన్ని తగ్గించాలనే ఉద్దేశంతో ఈ కార్యక్రమాన్ని నిర్వహిస్తున్నట్లు తెలిపారు. కాలేయ వ్యాధులు ప్రస్తుతం ప్రధాన ఆరోగ్య సవాలుగా మారుతున్న నేపథ్యంలో యువ వైద్యులకు తాజా వైద్య పరిజ్ఞానం, క్లినికల్ దృక్పథాన్ని అందించేందుకు ఇటువంటి అకాడమిక్ కార్యక్రమాలు ఎంతో అవసరం అన్నారు. డాక్టర్ జీ. శ్రీనివాస్ మాట్లాడుతూ.. నిరంతర వైద్య విద్యే నాణ్యమైన వైద్య సేవలకు బలమైన పునాది అని, స్టార్ లివర్ టాల్క్స్-2026లో నిర్వహించిన శాస్త్రీయ చర్చలు, బహుళ విభాగాల సమన్వయంతో జరిగిన కేస్ ప్రెజెంటేషన్లు, కాలేయ వ్యాధుల చికిత్సను మరింత మెరుగుపరచాలనే మా ఉమ్మడి సంకల్పాన్ని ప్రతిబింబిస్తున్నాయని అన్నారు. ఆశ్రమ్ హాస్పటల్ సీఈఓ డాక్టర్ కె . హనుమంతరావు మాట్లాడుతూ.. అకాడమిక్ ప్రతిభ, నాణ్యమైన వైద్య సేవలు ఒకదానికొకటి పరస్పరపూరకాలు. ఇటువంటి కార్యక్రమాలు విద్యార్థులు, వైద్యులు, నిపుణులు ఒకే వేదికపై కలిసి తాజా వైద్య పరిజ్ఞానాన్ని పంచుకునేందుకు, ప్రాంతీయ వైద్య రంగాన్ని మరింత బలోపేతం చేసేందుకు దోహదపడతాయని, ఈ కార్యక్రమంలో స్టార్ హాస్పిటల్ భాగస్వామ్యం కావడం మాకు గర్వకారణం అన్నారు. ఏలూరు ఆశ్రమ్ మెడికల్ కాలేజీ ప్రిన్సిపల్ డాక్టర్ చెబ్రోలు శ్రీనివాస్ మాట్లాడుతూ.. భవిష్యత్ వైద్య నిపుణులను ఉత్తమ అకాడమిక్ కార్యక్రమాల ద్వారా తీర్చిదిద్దేందుకు మా సంస్థ కట్టుబడి ఉందని తెలిపారు. ఈ కార్యక్రమం ద్వారా విద్యార్థులు, పీజీ వైద్యులు ప్రముఖ నిపుణులతో ప్రత్యక్షంగా మమేకమై హెపటాలజీ, లివర్ ట్రాన్స్ప్లాంటేషన్లో ఆధునిక వైద్య విధానాలపై విలువైన అవగాహన పొందారని అన్నారు.