హైదరాబాద్: రాష్ట్రంలోని మత్స్యకారుల సంక్షేమానికి పెద్దపీట వేస్తున్న తెలంగాణ ప్రభుత్వం.. మరో కీలక నిర్ణయం తీసుకుంది. 2026-27 ఆర్థిక సంవత్సరానికి రాష్ట్రవ్యాప్తంగా ఉన్న 4,21,767 మంది నమోదిత మత్స్యకారులకు గ్రూప్ ప్రమాద బీమా పథకం (GAIS)ను వర్తింపజేస్తూ ఉత్తర్వులు జారీ చేసింది. ఈ మేరకు రాష్ట్ర పశుసంవర్ధక, మత్స్యశాఖ మంత్రి వాకిటి శ్రీహరి సోమవారం ఒక ప్రకటనలో వివరాలు వెల్లడించారు.వృత్తిరీత్యా రిస్క్తో కూడుకున్న పనిలో ఉండే మత్స్యకారులు ప్రమాదవశాత్తు మరణిస్తే లేదా వికలాంగులైతే వారి కుటుంబాలు రోడ్డున పడకుండా ఆర్థిక భరోసా కల్పించడమే ఈ పథక ప్రధాన ఉద్దేశమని మంత్రి పేర్కొన్నారు.
- ఎవరికి వర్తిస్తుంది? ప్రీమియం ఎవరిది?
వయోపరిమితి: 18 నుంచి 70 సంవత్సరాల మధ్య వయస్సున్న నమోదిత మత్స్యకారులందరూ ఈ పథకానికి అర్హులు. - ప్రీమియం భారం శూన్యం: ఒక్కో లబ్ధిదారుడికి రూ.79.96 చొప్పునయ్యే బీమా ప్రీమియాన్ని కేంద్ర, రాష్ట్ర ప్రభుత్వాలు 60:40 నిష్పత్తిలో భరిస్తున్నాయి.
- ప్రభుత్వ నిధులు: రాష్ట్ర ప్రభుత్వం తన వాటా కింద ఏకంగా రూ.21,34,79,673 నిధులను జమ చేస్తోంది. దీంతో మత్స్యకారులపై ఎలాంటి ఆర్థిక భారం పడదని మంత్రి స్పష్టం చేశారు.
- అమలు: ఈ ఏడాది జూన్ 1 నుంచి ఈ పాలసీ కాలం అమల్లోకి వచ్చిందని, అర్హులైన ప్రతి ఒక్కరికీ నిరంతర బీమా రక్షణ లభిస్తుందని తెలిపారు.
బీమా ద్వారా అందే ఆర్థిక సాయం వివరాలు:
- ప్రమాదవశాత్తు మరణిస్తే: రూ. 5.00 లక్షలు
- శాశ్వత సంపూర్ణ వైకల్యం సంభవిస్తే: రూ. 5.00 లక్షలు
- శాశ్వత పాక్షిక వైకల్యానికి గురైతే: రూ. 2.50 లక్షలు
- ప్రమాదంలో గాయపడి ఆసుపత్రిలో చికిత్స పొందితే గరిష్ఠంగా రూ. 25,000 వరకు వైద్య ఖర్చులు అందజేస్తారు.
మత్స్యకారుల కుటుంబాలకు సంక్షేమ రక్షణ కల్పించేందుకు ప్రభుత్వం ప్రవేశపెట్టిన ఈ గ్రూప్ ప్రమాద బీమా పథకాన్ని అర్హులైన వారందరూ సద్వినియోగం చేసుకోవాలని మంత్రి శ్రీహరి కోరారు. ఆపద సమయంలో మత్స్యకార కుటుంబాలకు ఈ పథకం నిజమైన భరోసా ఇస్తుందని ఆయన విశ్వాసం వ్యక్తం చేశారు.
