- పెద్ద శస్త్రచికిత్సలను నివారించిన మెడికవర్ వైద్యులు
- 40 ఏళ్ల రోగికి దీర్ఘకాలిక యాసిడ్ రిఫ్లక్స్ నుంచి ఉపశమనం..
- 39 ఏళ్ల రోగికి అరుదైన పేగు కణితి తొలగింపు
శేరిలింగంపల్లి, ( ప్రభంజనం )
జీర్ణకోశ సంబంధిత క్లిష్టమైన వ్యాధులకు అధునాతన ఎండోస్కోపీ విధానాలతో చికిత్స అందిస్తూ, పెద్ద శస్త్రచికిత్సలకు ప్రత్యామ్నాయాలను అందించడంలో మెడికవర్ హాస్పిటల్స్ హైటెక్ సిటీ వైద్య బృందం రెండు కీలక విజయాలు సాధించింది. కన్సల్టెంట్ మెడికల్ గ్యాస్ట్రోఎంటరాలజిస్ట్ డాక్టర్ అరుణ్ అరోరా పగడపెల్లి నేతృత్వంలో ఇద్దరు రోగులకు వినూత్న ఎండోస్కోపీ విధానాలతో విజయవంతంగా చికిత్స అందించారు.
మొదటి కేసులో, 40 ఏళ్ల రోగి కొన్నేళ్లుగా గ్యాస్ట్రోఈసోఫేజియల్ రిఫ్లక్స్ డిసీజ్ (జీఈఆర్డీ)తో బాధపడుతున్నారు. అధిక మోతాదులో మందులు వాడినా, జీవనశైలిలో మార్పులు చేసుకున్నా గుండెల్లో మంట, ఆహారం తిరిగి గొంతులోకి రావడం, నిద్రలేమి వంటి సమస్యలు తగ్గలేదు. దీంతో రోగికి పీఓఈఎం-ఎఫ్ (పర్-ఓరల్ ఎండోస్కోపిక్ మయోటమీ విత్ ఫండోప్లికేషన్) విధానంలో చికిత్స అందించారు. బయటి కోతలు లేకుండా నిర్వహించిన ఈ ప్రక్రియ అనంతరం రోగి లక్షణాల నుంచి పూర్తిగా ఉపశమనం పొంది, యాసిడ్ తగ్గించే మందులు నిలిపివేసి సాధారణ జీవనానికి తిరిగి వచ్చారు.
రెండో కేసులో 39 ఏళ్ల రోగి డ్యూడినమ్‌లోని డీ2-డీ3 జంక్షన్ వద్ద అరుదైన న్యూరోఎండోక్రైన్ ట్యూమర్‌తో బాధపడుతున్నారు. కీలక అవయవాలకు సమీపంలో ఉన్న ఈ కణితికి సాధారణంగా పెద్ద శస్త్రచికిత్స అవసరమయ్యే అవకాశం ఉంది. అయితే, ఎండోస్కోపిక్ సబ్‌మ్యూకోసల్ డిసెక్షన్ (ఈఎస్డీ) విత్ లూప్ అండ్ క్లిప్ క్లోజర్ ద్వారా కణితిని ఒకే ముక్కగా పూర్తిగా తొలగించి, ఏర్పడిన గాయాన్ని సురక్షితంగా మూసివేశారు. ఎలాంటి సమస్యలు లేకుండా కోలుకున్న రోగిని 48 గంటల్లోనే డిశ్చార్జ్ చేశారు. దీంతో డ్యూడినమ్, ప్యాంక్రియాస్‌ను సంరక్షిస్తూ పెద్ద శస్త్రచికిత్సను నివారించగలిగారు.
ఈ సందర్భంగా డాక్టర్ అరుణ్ అరోరా పగడపెల్లి మాట్లాడుతూ.. ఈ రెండు కేసులు అధునాతన ఎండోస్కోపీ వైద్యంలో వస్తున్న పురోగతికి నిదర్శనమని, గతంలో పెద్ద శస్త్రచికిత్సలు అవసరమయ్యే కొన్ని క్లిష్టమైన వ్యాధులకు, సరైన రోగులను ఎంపిక చేసినప్పుడు, ఈ విధానాలు సమర్థవంతమైన ప్రత్యామ్నాయాలుగా నిలుస్తాయని అన్నారు. అవయవాలను సంరక్షించడం, కోలుకునే సమయాన్ని తగ్గించడం, రోగుల జీవన నాణ్యతను మెరుగుపరచడం మా ప్రధాన లక్ష్యాలు అని తెలిపారు. అత్యాధునిక ఎండోస్కోపీ సాంకేతికతతో సంక్లిష్టమైన జీర్ణకోశ వ్యాధులకు తక్కువ కోతలతో చికిత్స అందించే దిశగా మెడికవర్ హాస్పిటల్స్ కృషి చేస్తోందని తెలిపారు.
